AF222a: 23v

Meh‑ile mihre zevāl‑ile ėrgüren noqṣān
Kemāl‑i ḥüsnle bu cebhe vü ʿiẕāruñdur

Bu göñlümi ėden āvāre dem‑be‑dem ʿömrüm
Senüñ hevā‑i ser‑i zülf‑i bī‑qarāruñdur

Tenüm ki surḫ u siyāh oldı sengle yėr yėr
Baña bu resmle naqş ey göñül nigāruñdur

Seni kemāli‑yile naẓm eyleyen Naẓmī
Kelām‑i muntaẓam u naẓm‑i dür‑nis̱āruñdur

ġazel‑i Naẓmī

hezec: mefāʿīlün ‑ mefāʿīlün ‑ mefāʿīlün ‑ mefāʿīlün

Leb‑i laʿlinde yāruñ ḫaṭ ki ġāyet ḫūb u raʿnādur
Yazılmış levḥ‑i yāqūt üstine esmā‑i ḥüsnādur

Bu‑gün deyr‑i cemāl içre olan zībā ṣanemlerden
Bu ḥüsn‑i ṣūret‑ile ol nigāruñ naqşı zībādur

Naẓarda rūy‑i zībā‑i nigār olmasa ʿuşşāqa
Gül‑i ter seyri gülzār içre bir qurı temāşādur

Ġam‑i devrānı dilden sāqiyā defʿ eyleyüp defʿi
Ṣafā vėren müdām ehl‑i dile cām‑i muṣaffādur

Cihānda Naẓmiyā sen‑kim mey ü maḥbūba māyilsin
Senüñ ancaq yėrüñ şehr‑i Sitānbul u Qalatadur

ġazel‑i Naẓmī

hezec: mefāʿīlün ‑ mefāʿīlün ‑ mefāʿīlün ‑ mefāʿīlün

Dėdüm bu sünbül‑i zülfüñ ki ey gül‑ruḫ semen‑būdur
Dimāġı ḫoş ėden bu mıdur her dem dėdi budur

Ser‑i mūdur dėdüm yāruñ femi yoq dėdiler ammā
Bėli mūdur dėdüm anuñ dėdiler kim belī mūdur

Cemāl‑i ḥüsnle eksik degüldür yār‑i Yūsufda
Bu andan artuġ olduġına şübhe göz terāzūdur

Cemāl‑i ḥüsnle göñlüm alub ʿaqlum qılub yaġmā
Beni āşüfte vü dīvāne ėden bir perī‑rūdur

Feraḥdan yėre göge ṣıġmasam Naẓmī n’ola ben kim
Bi‑ḥamdi llāh nigārum bir perī‑rūy u melek‑ḫūdur

[Naẓmī]

hezec: mefʿūlü ‑ mefāʿīlü ‑ mefāʿīlü ‑ feʿūlün

ġazel

Yāruñ ser‑i kūyına şu kim dest‑resi var
Eblehdür eger bāġ‑i cināna hevesi var

Sevdāya düşüp yine yėler özge hevāda
Dil kim ser‑i zülfine nigāruñ hevesi var

Ṭutsa reh[‑]i dil‑dārı dilā ṭañ‑mıdur aġyār
Elbette çü Kaʿbe yolınuñ ḥār u ḫası var

b‑q